VELIPOJË, 18 Shkurt 2026 – Banorët e zonës Baks-Rrjoll në Velipojë kanë hyrë në ditën e 16-të të protestës kundër ndërtimit të një resorti turistik në tokat që pretendojnë se janë pronë e tyre e trashëguar brez pas brezi.

Paraditen e kësaj të mërkure, Policia e Shkodrës shoqëroi 6 banorë, mes tyre edhe një grua, pasi ata bllokuan rrugën për punonjësit e firmës ndërtuese që po vijon punimet në zonë. Protestat janë shoqëruar me përplasje dhe incidente, ndërsa rreth 60 familje kërkojnë ndalimin e menjëhershëm të projektit.

Banorët paralajmërojnë se, nëse Gjykata e Apelit Administrativ nuk vendos pezullimin e punimeve, ata do të nisin grevë urie përpara ambienteve të SPAK. Akuza për falsifikim dhe kallëzim penal

Sipas banorëve, resorti po ndërtohet mbi toka që i kanë në pronësi të trashëguar. Ata kanë depozituar kallëzim penal që më 25 mars të vitit të kaluar ndaj firmës ndërtuese dhe personave që dyshohet se kanë falsifikuar dokumentacionin e pronësisë në zonën Baks-Rrjoll.

Kjo është hera e dytë që ata paraqiten në SPAK për të kërkuar hetim mbi çështjen.

Projekti “Blue-Borgo” dhe statusi special

Resorti turistik “Blue-Borgo” parashikohet të ndërtohet në kufi mes zonës së Rana e Hedhun dhe Baks-Rrjollit, me një sipërfaqe prej 147.2 hektarësh. Projekti përfshin vila dhe hotele luksoze me 5 yje.

Më 31 dhjetor 2024, biznesmeni Bashkim Ulaj, së bashku me vëllezërit e tij Astrit dhe Ahmet Ulaj, morën statusin e veçantë “investitor në strukturë akomoduese me 5 yje, status special” për zhvillimin e këtij resorti në bregdetin e Velipojës.

Ndërkohë, tensionet në terren vijojnë, teksa banorët shprehen të vendosur për të kundërshtuar projektin, duke deklaruar se “tokën nuk e lëshojnë deri në vdekje”.