NISSEMI, Itali – Kryeministrja italiane, Giorgia Meloni, vizitoi sot qytetin e Niscemi në Siçilia, ku mbi 2 mijë banorë janë detyruar të braktisin banesat për shkak të rrëshqitjeve të dheut të shkaktuara nga moti i keq.

Fenomeni u përkeqësua tre javë më parë pas kalimit të stuhisë “Harry”, ndërsa fronti i përgjithshëm i rrëshqitjeve tashmë shtrihet në mbi pesë kilometra, duke rrezikuar zona të tëra të banuara.

Fond emergjent prej 150 milionë eurosh

Gjatë takimit me qytetarët e prekur, Meloni njoftoi se qeveria në Romë do të akordojë menjëherë 150 milionë euro për përballimin e situatës.

Sipas njoftimit zyrtar, fondi do të përdoret për:

Shembjen e ndërtesave të pabanueshme

Ndërtimin e banesave të reja Ndërhyrje mbrojtëse për stabilizimin e territorit dhe kufizimin e rrëshqitjeve

Masat konkrete pritet të miratohen të mërkurën përmes një dekreti legjislativ.

Komisioner i posaçëm për menaxhimin e krizës

Kreu i Mbrojtjes Civile Italiane, Fabio Ciciliano, do të marrë gjithashtu rolin e komisionerit të posaçëm qeveritar për koordinimin dhe zbatimin e ndërhyrjeve në Niscemi.

Ndihma do të përfshijë edhe mbështetje financiare për fermerët që nuk kanë akses në tokat e tyre, si dhe për qytetarët që nuk mund të punojnë për shkak të shpalljes së “zonës së kuqe”, e vendosur për të garantuar sigurinë e banorëve.

Autoritetet italiane e konsiderojnë situatën një nga emergjencat më serioze mjedisore të muajve të fundit në jug të vendit.