TIRANË, 16 shkurt 2026 – Kryetari i Partisë Demokratike, Sali Berisha, ka reaguar ashpër ndaj nismës ligjore të Partisë Socialiste për ndryshimet që kufizojnë pezullimin nga detyra të zyrtarëve të lartë, duke e cilësuar këtë si një përpjekje për “asgjësimin e sistemit të drejtësisë” dhe mbrojtjen e vetë kryeministrit Edi Rama dhe “bandës së tij plaçkitëse në qeveri”.

Në një konferencë për mediat, Berisha theksoi se pezullimi i zyrtarëve nga detyra nuk synon pezullimin e funksioneve të shtetit, por përbën një mekanizëm ligjor për ndëshkimin e zyrtarëve të lartë që abuzojnë me pushtetin dhe vjedhin pasuritë publike. Ai shtoi se amendamentet e propozuara nga PS kanë vetëm një qëllim: të mbrojnë Edi Ramën dhe anëtarët e qeverisë nga përgjegjësia penale dhe politike.

“Pezullimi synon mbrojtjen e institucioneve, ligjshmërinë e tyre dhe funksionimin e tyre sipas ligjit. Ajo që po ndodh tani është rezultat i veprimeve të një kryehajduti që ka qindra firma për plaçkitje dhe grabitje, qoftë të taksave, qoftë të pasurive publike. Edi Ramës i ka ardhur fundi”, deklaroi Berisha.

Ai gjithashtu u mbështet në opinionet ndërkombëtare, duke përmendur Këshillin e Venecias dhe praktikën e Kosovës për Kodin e Procedurës Penale, duke argumentuar se prokurorët dhe gjykatat kanë të drejtë kushtetuese të pezullojnë zyrtarët që abuzojnë me detyrën për të mbrojtur interesat e qytetarëve.

Reagimi i Berishës vjen pas diskutimeve mbi ndryshimet që kufizojnë pezullimin e kryeministrit, ministrave dhe zyrtarëve të tjerë të lartë nga SPAK, në një kohë kur qeveria po nxit ligje për të mbrojtur vetë pushtetin e saj.