Një incident në linjën hekurudhore në Zvicër, autoritetet në terren – raportohet për të lënduar

Një tren ka dalë nga shinat të hënën në mëngjes në zonën Goppenstein, në kantonin Valais të Zvicrës, pasi një masë dëbore ka goditur linjën hekurudhore. Autoritetet konfirmuan se një operacion emergjent është në zhvillim dhe se ka persona të lënduar.

Policia lokale njoftoi përmes një postimi në platformën X se forcat e sigurisë dhe ekipet e shpëtimit ndodhen në vendngjarje. Sipas raportimeve të para, disa pasagjerë kanë pësuar lëndime, ndërsa situata është ende në vlerësim.

Një përfaqësues i kompanisë hekurudhore BLS bëri të ditur se dalja nga shinat është shkaktuar nga një ortek që ka goditur linjën në zonën Stockgrabe, mes Goppenstein dhe Hochten. Në tren udhëtonin rreth 80 pasagjerë.

Hekurudhat Federale Zvicerane (SBB) njoftuan se qarkullimi në këtë segment do të qëndrojë i pezulluar të paktën deri në orën 04:00 të mëngjesit të së martës.

Sipas mediave vendase, treni ishte një linjë ekspres rajonale që ishte nisur nga Spiez, në kantonin e Bernës, rreth orës 06:00. Kompania bëri të ditur se evakuimi i pasagjerëve do të kryhej menjëherë.

Autoritetet vijojnë operacionin në terren, ndërsa priten njoftime të mëtejshme zyrtare lidhur me gjendjen e pasagjerëve dhe rrethanat e plota të ngjarjes.