DURRËS, 14 SHKURT 2026-Kryeministri Edi Rama është përplasur me banorët e Durrësit pas përfundimit të një mbledhjeje lidhur me projektin TID, një nismë qeveritare për kthimin e zonës arkeologjike të qytetit në një park urban.

Banorët protestuan duke i thirrur Ramës “O hajdut”, ndërsa ai u përgjigj duke deklaruar se qytetarët që po protestonin ishin pjesë e Partia Demokratike dhe jo qytetarë të pavarur: “Çfarë qytetarësh, ju jeni partia demokratike, këta janë qytetarët, unë ja ku jam me ta. Ju jeni PD. Unë me këta jam…”, tha Rama.

Bashkia e Durrësit ka paralajmëruar se më 16 shkurt do të nisë procesi i largimit vullnetar të banorëve nga banesat për të vazhduar me realizimin e Projektit TID, një hap ky që ka nxitur tension dhe pakënaqësi në komunitetin lokal.

Qytetarët kanë shprehur shqetësime mbi mënyrën e zbatimit të projektit dhe ndikimin që mund të ketë në jetën e përditshme, duke bllokuar hyrjet dhe duke kërkuar ndërhyrje për të ruajtur pronat dhe interesat e tyre.