DURRËS, 14 SHKURT 2026 – Qytetarët e Durrësit, të cilët preken drejtpërdrejt nga projekti TID, kanë vijuar edhe sot protestën e tyre përpara dyerve të Bashkia Durrës, duke kërkuar sqarime dhe transparencë mbi zbatimin e projektit.

Sipas informacioneve, një përfaqësi e banorëve po zhvillon një takim në ambientet e bashkisë, ndërsa në mbështetje të këtij takimi ka mbërritur edhe Kryeministri Edi Rama.

Protestuesit shprehen se projekti TID prek drejtpërdrejt pronat dhe interesat e tyre, ndërsa kërkojnë rishikim të planit dhe garanci ligjore për kompensimin apo zgjidhjen e situatës së tyre.

Mbërritja e kreut të qeverisë në Bashkinë e Durrësit pritet të shërbejë për një diskutim të drejtpërdrejtë me përfaqësuesit e banorëve, në përpjekje për të gjetur një zgjidhje mbi ngërçin e krijuar.

Situata para bashkisë ka qenë e qetë, por e mbushur me tension, ndërsa qytetarët kanë paralajmëruar se do të vijojnë reagimin e tyre nëse kërkesat nuk merren në konsideratë.