FRANCË – Ortek fatal në Alpet franceze, humbin jetën tre skiatorë

Një ngjarje e rëndë është shënuar në Alpet franceze, ku tre skiatorë kanë humbur jetën pasi u përfshinë nga një ortek bore në një zonë jashtë pistave të sigurta. Sipas autoriteteve lokale, orteku goditi gjithsej gjashtë persona që po bënin ski jashtë pistës, katër prej të cilëve ishin të shoqëruar nga një udhërrëfyes profesionist.

Menaxheri i resortit të skive bëri të ditur se, pavarësisht reagimit të shpejtë të ekipeve të shpëtimit, tre persona nuk arritën t’u mbijetonin plagëve. Ai theksoi se viktimat ishin të pajisura me transmetues për lokalizimin në rast orteku, por forca e masës së borës rezultoi fatale.

Autoritetet kanë paralajmëruar se rreziku i ortekëve në zonë mbetet shumë i lartë, duke u bërë thirrje skiatorëve të qëndrojnë vetëm në pista të sigurta dhe të pajisura me sinjalizim dhe mjete gjurmimi.

Më herët, shërbimi meteorologjik Meteo-France kishte lëshuar paralajmërime për rrezik të shtuar ortekësh në këtë rajon. Si pasojë, disa vendpushime skish në Alpet franceze kanë vendosur të mbyllin pjesërisht ose plotësisht pistat, për të shmangur ngjarje të tjera tragjike.