Arrestohen në Tiranë tre shtetas nga Turqia pas denoncimit të një turisteje suedeze

Tre shtetas nga Turqia janë arrestuar në Tiranë, pas një denoncimi të bërë nga një turiste 31-vjeçare nga Suedia, e cila ka deklaruar se është abuzuar gjatë qëndrimit të saj në kryeqytet.

Sipas denoncimit, ngjarja ka ndodhur në orët e para të mëngjesit të 12 shkurtit (e enjte). Denoncimi u bë në Komisariatin nr 2 të Tiranës.

Policia e Tiranës e pyetur nga noa.al tha se përdhunimi ka ndodhur me një nga të dyshuarit, Cicek, ndërsa 2 të tjerët sipas saj nuk janë përfshirë.

Vajza nga Suedia V. E. u dërgua për ekzaminim në Institutin e Mjekësisë Ligjore, ku u konstatuar shenja dhe dëmtime që përputhen me dhunë seksuale.

Sipas të dhënave paraprake, ngjarja dyshohet se ka ndodhur në një apartament me qira në zonën e Zogut të Zi, ku turistja suedeze ishte ftuar nga personat e arrestuar. Pas kallëzimit, policia ka ndërhyrë duke kryer kontrolle në banesë.

Gjatë kontrollit, në apartament është gjetur dhe sekuestruar një sasi lënde e dyshuar narkotike, e llojit marihuanë.

Një nga të arrestuarit është identifikuar si Ferhatcan Cicek, 29 vjeç, ndërsa dy shtetasit e tjerë, 28 dhe 31 vjeç, janë bashkëkombës të tij. Të tre ndodhen aktualisht në paraburgim.

Policia dhe Prokuroria po vijojnë hetimet për zbardhjen e plotë të rrethanave të ngjarjes, ndërsa materialet procedurale i janë referuar organit të akuzës për veprime të mëtejshme ligjore. /noa.al