TIRANË, 12 shkurt 2026 – Policia e Tiranës ka reaguar zyrtarisht pas tentativës për grabitje në një bankë të nivelit të dytë në zonën e Rrugës së Kavajës, ku një 58-vjeçar dyshohet se hyri i armatosur dhe qëlloi një herë me armë zjarri në ambientet e brendshme.

Sipas njoftimit zyrtar, ngjarja ka ndodhur rreth orës 11:15.

“Rreth orës 11:15, në Rrugën e Kavajës, shtetasi B. F., rreth 58 vjeç, dyshohet se ka hyrë në ambientet e një banke, me qëllim vjedhjen e saj, duke qëlluar me armë zjarri në dysheme. Nga të shtënat nuk ka shtetas të dëmtuar,” njofton Policia.

Në një video të siguruar nga vendngjarja shfaqet momenti i ndërhyrjes së efektivëve dhe arrestimit të autorit të dyshuar, i cili tenton të largohet nga zona.

“Shërbimet e Policisë kanë ndërhyrë menjëherë pas marrjes së njoftimit dhe kanë bërë të mundur kapjen e autorit të dyshuar në tentativë për t’u larguar nga vendi i ngjarjes. Autori i dyshuar është shoqëruar në Komisariat. Gjithashtu, është sekuestruar arma e zjarrit,” thuhet më tej në reagim.

Grupi hetimor vijon punën për zbardhjen e plotë të rrethanave të ngjarjes dhe dokumentimin ligjor të saj.