Në kuadër të operacionit policor të koduar "Jug & Veri", vihen në pranga shtetasit Arben Guçe, Elion Qeva, Fran Pjetra dhe Mark Muraca

ELBASAN – Një grup kriminal i përfshirë në trafikimin e lëndëve narkotike dhe armëve, me veprimtari në disa qytete të vendit nga veriu në jug, është goditur nga Policia e Elbasanit në kuadër të një operacioni të gjerë policor të koduar “Jug & Veri”.

Operacioni u finalizua pas disa javësh hetime intensive nga Seksioni për Hetimin e Narkotikëve në DVP Elbasan, në bashkëpunim me Forcën e Posaçme Operacionale, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan.

Si rezultat i operacionit, u arrestuan në flagrancë tre shtetas, të dyshuar për trafikim të lëndëve narkotike dhe armëve:

Arben Guçe, 31 vjeç

Elion Qeva, 29 vjeç

Fran Pjetra, 35 vjeç

Gjithashtu, u ndalua me iniciativë shtetasi Mark Muraca, 31 vjeç, banues në Shkodër, i cili dyshohet se ka vënë në dispozicion automjetin e tij për transportimin e lëndës narkotike.

Sipas hetimeve, këta shtetas, në bashkëpunim me njëri-tjetrin, siguronin dhe transportonin sasi të konsiderueshme të lëndës narkotike Cannabis Sativa, me qëllim shpërndarjen dhe shitjen në disa qytete të vendit, si dhe trafikimin e saj jashtë territorit të Shqipërisë.

Gjatë ndërhyrjes së Policisë në unazën e qytetit të Elbasanit, drejtuesi i njërit prej automjeteve, shtetasi A. G., ka kundërshtuar punonjësit e Policisë dhe, gjatë tentativës për t’u larguar, ka dëmtuar mjetin e shërbimit policor.

Nga kontrolli i automjetit që drejtohej nga A. G., me pasagjer shtetasin E. Q., u gjet dhe u sekuestrua një armë zjarri kallashnikov, së bashku me 32 fishekë luftarakë, e cila dyshohet se do të trafikohej.

Ndërkohë, në automjetin tip “Volkswagen Golf”, me drejtues shtetasin F. P., Policia gjeti dhe sekuestroi 41 kilogramë lëndë të dyshuar narkotike Cannabis Sativa, e cila dyshohet se po transportohej nga Shkodra drejt Elbasanit, me destinacion të mundshëm Pikën e Kalimit Kufitar Qafë Thanë.

Në cilësinë e provës materiale u sekuestruan:

41 kg lëndë e dyshuar narkotike Cannabis Sativa

1 armë zjarri kallashnikov me municion luftarak

2 automjete

2 aparate celularë

Materialet procedurale i janë referuar Prokurorisë së Elbasanit për veprat penale: “Trafikimi i narkotikëve”, “Trafikimi i armëve dhe municionit”, “Kundërshtimi i punonjësit të policisë së rendit publik”, “Shkatërrimi i pronës” dhe “Shkelja e rregullave të qarkullimit rrugor”.