Nga foltorja e selisë blu, kryedemokrati Sali Berisha deklaroi se kryeministri Edi Rama kishte planifikuar një skenar gjakderdhjeje gjatë protestës së djeshme të Partisë Demokratike.

Në fjalën e tij, Berisha falënderoi qytetarët e Tiranës dhe të gjithë Shqipërisë për pjesëmarrjen paqësore, duke e cilësuar protestën si një kapitull të ri në kryengritjen paqësore të shqiptarëve kundër “narkoregjimit” të Ramës.

“Pas 20 shkurtit të vitit 1991, 10 shkurti i vitit 2026 do të shënohet në historinë e përpjekjeve të shqiptarëve për liri dhe dinjitet kombëtar dhe njerëzor. Një mirënjohje e pakufishme u takon atyre që me protestën e tyre rikthyen shpresën dhe besimin e shqiptarëve në triumfin mbi narkoshtetin,” u shpreh Berisha.

Kryedemokrati theksoi gjithashtu se Shqipëria sot nuk është më e njëjta si dje dhe vlerësoi sakrificën e qytetarëve të gatshëm të mbrojnë vlerat më të çmuara të njeriut. Ai përmendi se protesta e djeshme ka bindur shqiptarët se fitorja mbi regjimin e Ramës është e sigurt.

Në linjë me këtë, analisti Blushi deklaroi se revolta dhe zemërata popullore kanë hyrë në një fazë të re përballjeje dhe do të përshkallëzohen, duke e cilësuar Ramën si një “kufomë politike” që duhet hedhur sa më parë.