Një tentativë vjedhjeje me thyerje gjatë orëve të para të mëngjesit është neutralizuar nga karabinierët në qytetin Rovato të Italisë, duke çuar në arrestimin e një shtetasi shqiptar.

Ngjarja ka ndodhur rreth orës 04:30 të mëngjesit të 7 shkurtit, kur një patrullë e Njësisë së Karabinierëve të Chiari, gjatë shërbimit përgjatë rrugës “Via Galdina”, konstatoi një person të veshur tërësisht me të zeza dhe me fytyrë të mbuluar, i cili po përpiqej të hapte me forcë derën kryesore të picerisë “Amici”.

Në momentin që vuri re praninë e forcave të rendit, i dyshuari tentoi të largohej me vrap, por u ndalua dhe u arrestua pas një ndjekjeje të shkurtër. Gjatë kontrollit personal, karabinierët gjetën dhe sekuestruan mjetin e përdorur për thyerjen e derës.

Autoritetet konfirmuan se i arrestuari është B.E., 32 vjeç, shtetas shqiptar, banues në Këln të Gjermanisë dhe me precedentë penalë.

Arrestimi u bë i mundur edhe falë denoncimit të menjëhershëm të pronarit të picerisë, si dhe pamjeve të kamerave të sigurisë, të cilat dokumentuan përpjekjen për hyrje të dhunshme në ambientet e lokalit.

32-vjeçari akuzohet për tentativë grabitjeje, ndërsa materialet procedurale i janë referuar autoriteteve përkatëse për veprime të mëtejshme ligjore.