VLORË – Një ngjarje e rëndë ka tronditur qytetin e Vlorës, ku një fëmijë 4-vjeçar ka ndërruar jetë ditën e premte, pasi ishte paraqitur pa shenja jete në spital.

Sipas informacioneve paraprake, familja e vogëlushit, e cila banon në Palasë, e ka transportuar me urgjencë drejt Orikumit, ndërsa ambulanca e zonës e ka marrë fëmijën pa shenja jete dhe e ka dërguar për ndihmë mjekësore.

Pa shenja dhune

Ekzaminimi paraprak mjeko-ligjor nuk ka konstatuar shenja dhune apo dëmtime të tjera në trupin e fëmijës.

Bëhet me dije se 4-vjeçari kishte rreth një javë që shfaqte simptoma shëndetësore, si temperaturë e lartë, të vjella dhe diarre, përpara se gjendja e tij të përkeqësohej fatalisht.

Autoritetet po ndjekin procedurat për zbardhjen e plotë të rrethanave të kësaj ngjarjeje të rëndë, ndërsa familja ndodhet në gjendje të rënduar emocionale.