Një ngjarje e rëndë është regjistruar mëngjesin e së premtes në rajonin e Pierias, në Greqi, ku një trup njeriu u gjet brenda një automjeti të djegur.

Sipas autoriteteve, Departamenti i Zjarrfikësve u njoftua rreth orës 10:00 për një zjarr në zonën e Sfendamit. Në vendngjarje ndërhynë gjashtë zjarrfikës me tre automjete, të cilët arritën ta vinin flakët nën kontroll.

Gjatë operacionit të shuarjes së zjarrit, zjarrfikësit zbuluan brenda automjetit trupin e pajetë të një burri, i cili ende nuk është identifikuar. Mediat lokale raportojnë se në makinë është gjetur edhe një bidon me benzinë.

Rrethanat e shpërthimit të zjarrit mbeten të paqarta, ndërsa Policia Helenike është njoftuar menjëherë dhe ka mbërritur në vendngjarje për të kryer veprimet hetimore. Hetimet vijojnë për identifikimin e viktimës dhe sqarimin e plotë të ngjarjes, ndërsa të gjitha pistat mbeten të hapura.