Ekzekutohen masat e sigurisë për 4 shtetas që ishin në hetim pasi dyshohet se i hoqën lirinë një 30-vjeçareje (familjare e tyre) dhe e dhunuan atë, për shkak të një konflikti në familje

Policia e Gjirokastrës ka ekzekutuar masat e sigurisë të vendosura nga Gjykata e Gjirokastrës për katër shtetas që ishin në hetim, pas dyshimeve për një ngjarje të rëndë të ndodhur në kuadër të një konflikti familjar.

Seksioni për Hetimin e Krimeve i Komisariatit të Policisë Gjirokastër, në bashkëpunim me Seksionin e Forcës së Posaçme “Shqiponja”, Stacionin e Policisë Këlcyrë dhe Komisariatin e Policisë Nr. 3 Tiranë, ka finalizuar ekzekutimin e masave të sigurisë për këta shtetas.

Gjykata ka caktuar masën e sigurisë “arrest në burg” për shtetasit A. A., 34 vjeç, vëllai i 30-vjeçares, dhe S. A., 54 vjeç, xhaxhai i saj, të dy banues në Tiranë, si edhe për shtetasin L. L., 43 vjeç, banues në Këlcyrë, bashkëshorti i 30-vjeçares. Dy shtetasit e parë u lokalizuan dhe u kapën në Tiranë, me ndihmën e shërbimeve të Komisariatit të Policisë Nr. 3.

Ndërkohë, për shtetasin E. M., 51 vjeç, banues në Tiranë, Gjykata ka vendosur masën e sigurisë “arrest në shtëpi”.

Sipas hetimeve paraprake, dyshohet se më datë 10 janar 2026, këta shtetas, duke vepruar në bashkëpunim me njëri-tjetrin, kanë mbajtur me forcë 30-vjeçaren në një automjet dhe më pas kanë ushtruar dhunë ndaj saj, për shkak të një konflikti në familje.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për vijimin e veprimeve ligjore.

Njoftimi i plotë

Seksioni për Hetimin e Krimeve i Komisariatit të Policisë Gjirokastër, në bashkëpunim me Seksionin e Forcës së Posaçme "Shqiponja", të DVP Gjirokastër, Stacionin e Policisë Këlcyrë dhe Komisariatin e Policisë Nr. 3 Tiranë, ekzekutoi masat e sigurisë të caktuara nga Gjykata e Gjirokastrës, për 4 shtetas që ishin në hetim.

U ekzekutua masa e sigurisë “Arrest në burg”, e caktuar nga Gjykata, për veprat penale "Dhuna në familje” dhe "Heqja e paligjshme e lirisë", kryer në bashkëpunim, për shtetasit:

– A. A., 34 vjeç (vëllai i 30-vjeçares) dhe S. A., 54 vjeç (xhaxhai i 30-vjeçares), të dy banues në Tiranë.

Këta shtetas u lokalizuan dhe u kapën në bashkëpunim me shërbimet e Komisariatit të Policisë Nr. 3, Tiranë;

-L. L., 43 vjeç, banues në Këlcyrë (bashkëshorti i 30-vjeçares).

Gjithashtu, u ekzekutua masat e sigurisë "Arrest në shtëpi", për shtetasin E. M., 51 vjeç, banues në Tiranë, për veprën penale "Heqja e paligjshme e lirisë", kryer në bashkëpunim.

Nga hetimet dyshohet se këta shtetas, në bashkëpunim me njëri-tjetrin, më datë 10.01.2026, për shkak të një konflikti në familje, i kanë hequr lirinë 30-vjeçares, duke e mbajtur me forcë, në automjet, dhe më pas e kanë dhunuar.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

Foto arkiv