GJILAN – Të shtëna me armë zjarri janë raportuar mbrëmjen e sotme në rrugën Gjilan–Kamenicë, pranë një karburanti, ku si pasojë një person ka mbetur i plagosur.

Lajmin e ka konfirmuar zëdhënësi i Policisë për rajonin e Gjilanit, Ismet Hashani, i cili bëri të ditur se dyshohet se në ngjarje kanë qenë të përfshira dy automjete në lëvizje.

“Njësitë policore kanë dalë menjëherë në vendin e ngjarjes, ku gjatë ekzaminimit janë gjetur dhe sekuestruar prova materiale që ndërlidhen me rastin. Policia e Kosovës, në koordinim me Prokurorin e Shtetit, është duke ndërmarrë veprimet e nevojshme hetimore dhe është në kërkim të personave të dyshuar lidhur me këtë rast,” thuhet në deklaratën zyrtare.

Gjendja shëndetësore e personit të plagosur nuk është bërë ende e ditur, ndërsa hetimet vijojnë për zbardhjen e plotë të rrethanave dhe motiveve të ngjarjes.