Tiranë, 4 shkurt 2026 – Kryeministri Edi Rama ka udhëtuar drejt Romës për të zhvilluar një vizitë zyrtare në Vatikan, i shoqëruar nga bashkëshortja e tij Linda Rama dhe një delegacion shqiptar.

Sipas njoftimit zyrtar, Rama do të vizitojë Pallatin Apostolik të Vatikanit, ku do të pritet në oborrin “San Damaso” nga Prefekti i Shtëpisë Papnore dhe përfaqësues të Selisë së Shenjtë. Kjo pritje do t’i paraprijë audiencës zyrtare që Kryeministri do të ketë me Papa Leonin XIV, e cila do të zhvillohet në Bibliotekën Papnore.

Gjatë qëndrimit në Vatikan, vizita do të vijojë në disa prej ambienteve më të rëndësishme të kompleksit apostolik, përfshirë Bazilikën e Shën Pjetrit, Stanza delle Lacrime, Cappella Paolina, Sala Reggia, Kapelën Sistine, si dhe në altarin e Shën Gjon Palit II.

Në përfundim të vizitës, Kryeministri Rama dhe bashkëshortja e tij do të nderojnë edhe vendvarrimin e Papa Françeskut, i cili ndodhet në bazilikën Santa Maria Maggiore.

Agenda e vizitës përfshin gjithashtu takime të tjera zyrtare, mes të cilave edhe një takim me Kardinalin Pietro Parolin, Sekretar Shteti i Vatikanit.

Vizita zhvillohet në kuadër të marrëdhënieve tradicionale mes Shqipërisë dhe Selisë së Shenjtë, si dhe dialogut ndërinstitucional mbi çështje me interes të përbashkët.