Tiranë – Kryeministri Edi Rama ka reaguar sërish ndaj kërkesës së Shoqatës së Gjyqtarëve për rritjen e pagave, duke e cilësuar atë si të papranueshme dhe të paprecedentë në praktikën europiane.

Në një komunikim për mediat, kreu i qeverisë u shpreh i surprizuar nga qëndrimi i shoqatës, duke theksuar se kërkesa për rritje pagash përmes vendimmarrjes gjyqësore përbën, sipas tij, një përpjekje për të ushtruar presion mbi Kuvendin dhe qeverinë.

“Jam absolutisht i surprizuar nga një reagim i pabesueshëm i Shoqatës së Gjyqtarëve, lidhur me një shqetësim që në këndvështrimin tim është i papranueshëm. Bëhet fjalë për një përpjekje për t’i imponuar Kuvendit dhe qeverisë, përmes pushtetit gjyqësor, rritjen e pagave për vetë gjyqtarët”, deklaroi Rama.

Kryeministri përdori tone të ashpra në kritikën e tij, duke e cilësuar këtë qasje si “tymnajë populiste” dhe duke theksuar se një praktikë e tillë nuk qëndron në asnjë vend të Europës.

“Nuk mund të thuash ‘topi është i imi, do ta gjuaj vetë dhe porta duhet të jetë bosh’. Nëse dëshironi të bëni politikë, regjistrohuni si parti dhe shpalosni platformën tuaj”, shtoi ai.

Debati për pagat e gjyqtarëve ka rikthyer përplasjet mes ekzekutivit dhe përfaqësuesve të sistemit të drejtësisë, në një kohë kur reforma në drejtësi mbetet një nga çështjet më të ndjeshme të agjendës publike.