Mediat libiane raportojnë se Saif al-Islam Gaddafi, djali i ish-udhëheqësit të Libisë, Muammar Gaddafi, dyshohet të ketë vr*arë në banesën e tij pranë qytetit Zintan, në perëndim të vendit.

Sipas raportimeve, katër persona të armatosur kryen një atentat ndaj tij. Deri tani, nuk janë dhënë detaje mbi identitetin e autorëve apo motivet e mundshme të sulmit.

Lajmi u konfirmua nga Abdullah Othman, këshilltari politik i Saif al-Islam, përmes një postimi të shkurtër në rrjetet sociale, pa dhënë detaje mbi rrethanat e ngjarjes. Ekipi politik i Gaddafit ka publikuar gjithashtu një deklaratë zyrtare, duke shprehur pikëllimin për vdekjen e tij.

Kush ishte Saif al-Islam Gaddafi

Saif al-Islam Gaddafi ishte një nga figurat më të njohura dhe më kontroverse të politikës libiane pas vitit 2011. Ai konsiderohej për shumë vite si pasardhësi politik i babait të tij, Muammar Gaddafi, i cili u rrëzua dhe u vr*a gjatë kryengritjes popullore dhe ndërhyrjes ndërkombëtare.

Pas rënies së regjimit, Saif al-Islam u arrestua nga grupe të armatosura në Zintan dhe qëndroi në paraburgim për disa vite, para se të lirohej në bazë të një amnistie. Në vitet e fundit, ai kishte tentuar të rikthehej në politikë dhe shprehur ambicie për zgjedhjet presidenciale, por procesi mbeti i bllokuar për shkak të krizës së vazhdueshme politike dhe të sigurisë në vend.

Emri i tij ka qenë gjithashtu i lidhur me akuza ndërkombëtare për krime gjatë konfliktit të vitit 2011.

Vdekja e Saif al-Islam Gaddafit pritet të ketë një ndikim të madh politik dhe simbolik në Libinë e përçarë, ku rivalitetet mes grupeve të armatosura dhe fraksioneve politike vazhdojnë të kërcënojnë stabilitetin e vendit.