Me afrimin e Kupës së Botës 2026, FIFA po përballet me kritika gjithnjë e më të forta nga tifozët që synojnë të ndjekin nga afër ndeshjet e turneut më të madh të futbollit në botë.

Pakënaqësia kryesore lidhet me çmimet e larta të biletave, ndërsa vetë FIFA ka pranuar se nuk mund të ndërhyjë për të ndalur rishitjen e tyre, pasi në Shtetet e Bashkuara ky aktivitet është i ligjshëm.

Së fundmi, një tjetër element ka shtuar revoltën e tifozëve. Sipas gazetarit Henry Bushnell të “The Athletic”, FIFA ka nisur të shesë edhe vendet e parkimit pranë impianteve sportive ku do të zhvillohen ndeshjet e Botërorit 2026.

Një vend parkimi pranë stadiumit “SoFi Stadium” në Los Angeles po ofrohet me çmime që variojnë nga 250 deri në 300 dollarë amerikanë, një shifër që është konsideruar e tepruar nga tifozët.

Situata bëhet edhe më problematike për shkak të infrastrukturës së transportit në SHBA, e cila ndryshon ndjeshëm nga ajo evropiane dhe e bën të domosdoshëm përdorimin e automjeteve private për të aksesuar stadiumet.

Përveç kostos së lartë, tifozët janë ankuar edhe për distancën nga vendet e parkimit deri te stadiumet, e cila në disa raste arrin deri në rreth 1.500 metra, duke e bërë përvojën edhe më të vështirë.

Këto zhvillime po rrisin presionin ndaj FIFA-s, e cila akuzohet se po e shndërron Botërorin 2026 në një event të paarritshëm për një pjesë të madhe të tifozëve.