Qarkullimi i automjeteve në aksin rrugor që lidh tunelin e Llogarasë me Dhërmiun dhe Himarën është bllokuar përkohësisht ditën e sotme, duke shkaktuar vështirësi për banorët dhe drejtuesit e mjeteve që qarkullojnë në këtë zonë.

Shkak i bllokimit është bërë procesi i punimeve për zgjerimin e rrugës në zonën e Palasës, ku firma kontraktore ka përdorur lëndë plasëse për shkëputjen e një masivi shkëmbor, në kuadër të hapjes së trasesë së re.

Si pasojë e shpërthimit me dinamit, një sasi e konsiderueshme inertesh dhe gurësh ka rënë mbi rrugën ekzistuese, duke e bërë atë të pakalueshme për automjetet.

Situata ka sjellë paralizimin e përkohshëm të qarkullimit në këtë segment të rëndësishëm turistik dhe strategjik të Bregut.

Menaxhimi i situatës po kryhet nga firma private që po realizon punimet, ndërsa mjetet e rënda ndodhen në terren dhe po punojnë për largimin e inerteve nga asfalti.

Autoritetet bëjnë me dije se qarkullimi do të rikthehet sapo të përfundojë pastrimi i plotë i aksit, ndërsa drejtuesve të mjeteve u kërkohet durim dhe kujdes i shtuar deri në normalizimin e situatës.