Një moment i pazakontë dhe emocional është shënuar gjatë ndeshjes së fundit të FC Köln në Bundesligë, ku një nga gjyqtarët gjermanë i propozoi martesë partnerit të tij para mijëra tifozëve.

Pascal Kaiser, gjyqtar futbolli dhe tifoz i njohur i FC Köln, i propozoi martesë partnerit të tij Moritz në stadiumin RheinEnergie, përpara rreth 50 mijë spektatorëve. Gjestit i parapriu një fjalim i gjatë dhe emocional, i cili u prit me duartrokitje të forta nga publiku.

“Dua që të gjithë ta shohin se e dua këtë person. Si person. Si qenie njerëzore. Në futboll”, u shpreh Kaiser gjatë fjalës së tij.

Momentin e veçantë e ndau edhe klubi i FC Köln në rrjetet sociale. Në një postim në Instagram, klubi theksoi se kishte mbështetur nismën e gjyqtarit, duke kujtuar se Kaiser kishte dalë hapur si biseksual tre vite më parë.

Çifti kishte festuar së fundmi përvjetorin e dytë të lidhjes së tyre, ndërsa Moritz i tha “po” propozimit gjatë ndeshjes, duke e kthyer momentin në një nga skenat më të komentuara të këtij sezoni në Bundesligë.