Një aksident trafiku me lëndime ka ndodhur sot në rajonin e Kaçanikut, te semafori i parë në drejtim të Hanit të Elezit.

Zëdhënësi i Policisë për rajonin e Ferizajt, Kanun Veseli, ka bërë të ditur se një veturë ka dalë jashtë rrugës kryesore dhe ka rënë poshtë saj. Si pasojë e aksidentit, një person ka mbetur i lënduar dhe është dërguar për trajtim mjekësor në Qendrën Emergjente në Ferizaj.

Sipas Policisë, aksidenti ka ndodhur rreth orës 11:20. Për shkak të ngjarjes, rruga është mbyllur përkohësisht në të dy korsitë, ndërsa në vendin e ngjarjes kanë dalë ekipet relevante, përfshirë Policinë, zjarrfikësit, emergjencën mjekësore dhe njësitin rajonal të trafikut të Ferizajt.

Autoritetet janë duke hetuar rrethanat e aksidentit, ndërsa qarkullimi do të rikthehet normalisht pas përfundimit të veprimeve në terren.