Një person është plagosur pasditen e sotme në Mitrovicë si pasojë e të shtënave me armë zjarri, kanë bërë të ditur autoritetet policore.

Sipas Policisë së Kosovës, rreth orës 14:00 është pranuar informacioni për një person të plagosur në rrugën “Ilaz Kodra”.

I lënduari, F.H., është transportuar menjëherë për të marrë ndihmë të specializuar mjekësore, ndërsa gjendja e tij shëndetësore nuk bëhet e ditur.

Pas veprimeve operative dhe hetimore, policia ka arritur të identifikojë dhe arrestojë shtetasin Q.Kurti, si person që dyshohet se ka plagosur viktimën.

Zëdhënësi i Policisë për rajonin e Mitrovicës, Avni Zahiti, deklaroi se nga i dyshuari është konfiskuar një armë zjarri, e cila do të shërbejë si provë materiale në procesin hetimor.

Policia e Kosovës ka bërë të ditur se hetimet po vazhdojnë për zbardhjen e plotë të rrethanave dhe motivit të ngjarjes.