Denoncim i rëndë në Durrës: Qentë u dërguan për trajnim, pronarët nuk i morën më

Një denoncim serioz është bërë pranë Policisë së Durrësit, ku dy qytetarë denoncojnë se janë mashtruar nga administratorët e një qendre trajnimi për qen, pasi kafshët e tyre nuk iu janë kthyer më.

Sipas njoftimit zyrtar të Drejtorisë Vendore të Policisë Durrës, specialistët për Hetimin e Krimeve të Komisariatit të Policisë kanë shpallur në kërkim shtetasit G. S., 40 vjeç, dhe R. S., 35 vjeçe, bashkëshortë, banues në Durrës.

Këta të dy administronin qendrën e trajnimit të qenve. Ata dyshohen për veprat penale “Mashtrimi” dhe “Shkelja e karantinës së bimëve dhe kafshëve”.

Kallëzimi është bërë nga shtetasit R. I. dhe M. D., të cilët kanë deklaruar se kanë dorëzuar qentë e tyre për trajnim, por nuk i kanë marrë më, pa asnjë sqarim apo kthim të kafshëve.

Policia bën me dije se po punohet për kapjen e personave të shpallur në kërkim, si dhe për sqarimin e plotë të rrethanave të këtij rasti.

Materialet procedurale i janë referuar Prokurorisë së Durrësit për veprime të mëtejshme ligjore.

Çfarë tha Drejtoria Vendore e Policisë Durrës

Specialistët për Hetimin e Krimeve të Komisariatit të Policisë Durrës shpallën në kërkim shtetasit G. S., 40 vjeç, dhe R. S., 35 vjeçe, bashkëshortë, banues në Durrës, të cilët administrojnë një qendër trajnimi për qen, për veprat penale “Mashtrimi” dhe “Shkelja e karantinës së bimëve dhe kafshëve”. Ndaj tyre kanë kallëzuar shtetasit R. I. dhe M. D., se janë mashtruar, duke dërguar qentë e tyre për trajnim dhe nuk i kanë marrë më. Punohet për kapjen e tyre dhe sqarimin e rrethanave të rastit.

Materialet procedurale iu referuan Prokurorisë së Durrësit, për veprime të mëtejshme.