Shijak – Një konflikt mes disa të rinjve, i dyshuar se ka nisur për motive xhelozie, ka përfunduar me plagosjen e rëndë të shtetasit Denis Çumani. Ngjarja po hetohet nga policia, ndërsa autorët janë shpallur në kërkim.

Sipas burimeve nga grupi hetimor, Çumani dyshohet se ka ngacmuar një vajzë, e cila ishte në një lidhje sentimentale me shtetasin Dorian Ferra. Ky i fundit ndodhej në një lokal së bashku me vajzën, e cila po merrte vazhdimisht mesazhe nga Çumani, të cilat ajo i fshinte për të shmangur një konflikt.

Pas insistimit të Ferrës për të mësuar identitetin e personit që po i shkruante, ai u informua për situatën dhe, sipas hetimeve, së bashku me kushëririn e tij Indrit Ferra, është drejtuar drejt banesës së Denis Çumanit.

Dhunë dhe përdorim i armës së zjarrit

Në banesën e viktimës, dy kushërinjtë dyshohet se e kanë dhunuar Çumanin me grushte dhe shkelma, ndërsa gjatë konfliktit i kanë vendosur edhe një armë zjarri në kokë dhe në brinjë, duke e qëlluar një herë dhe duke e lënë të plagosur rëndë.

I dëmtuari u transportua fillimisht në Spitalin Rajonal të Durrësit, ndërsa për shkak të gjendjes së rëndë shëndetësore u dërgua me urgjencë në Spitalin e Traumës në Tiranë, ku ndodhet nën kujdes intensiv mjekësor.

Autorët në kërkim

Pas ngjarjes, Dorian dhe Indrit Ferra janë larguar nga vendi i ngjarjes. Policia ka ngritur pika kontrolli dhe vijon punën për lokalizimin dhe arrestimin e tyre, ndërsa hetimet po vazhdojnë për të zbardhur plotësisht rrethanat dhe dinamikën e konfliktit.