Një aksident me pasoja fatale ka ndodhur pasditen e sotme në aksin rrugor Fier-Libofshë, në fshatin Agim, ku një 35-vjeçar humbi jetën pas një daljeje nga rruga me motorin që drejtonte.

Sipas informacionit paraprak të policisë, drejtuesi i motorit, Xhuliano Krasniqi, po udhëtonte me një motomjet pa targa kur humbi kontrollin dhe doli jashtë rrugës.

Ai u transportua menjëherë drejt Spitalit Rajonal Fier, por për fat të keq nuk mundi t’i mbijetojë plagëve të marra gjatë aksidentit dhe ndërroi jetë gjatë rrugës.

Në vendngjarje kanë mbërritur shërbimet e policisë dhe grupi hetimor, të cilët po punojnë intensivisht për të sqaruar rrethanat dhe shkaqet e sakta të aksidentit.

Hetimet do të përfshijnë faktorë të mundshëm si shpejtësia, kushtet e rrugës dhe gjendja teknike e motorrit.

Fier/ Informacion paraprak

Në aksin rrugor "Fier-Libofshë", shtetasi Xh. K., rreth 35 vjeç, duke drejtuar një motomjet pa targa, ka humbur kontrollin e motomjetit dhe ka dalë nga rruga.

Si pasojë e daljes së motomjetit nga rruga ka humbur jetën shtetasi Xh. K.

Grupi hetimor ndodhet në vendngjarje dhe po punon për sqarimin e plotë të rrethanave të aksidentit.