Mat – Policia ka finalizuar me sukses operacionin e koduar “Start”, duke goditur një tjetër rast të shitjes së lëndëve narkotike në doza, në kuadër të kontrolleve të intensifikuara kundër kësaj veprimtarie kriminale.

Specialistët për Hetimin e Narkotikëve të Drejtorisë Vendore të Policisë Dibër, në bashkëpunim me Komisariatin e Policisë Mat, kanë arrestuar në flagrancë një shtetas, i cili shiste doza kanabisi në ambientin e punës së tij.

Në pranga ka rënë F.P., 38 vjeç, banues në fshatin Suç, Klos. Sipas policisë, gjatë kontrollit të ushtruar në ambientet e një bilardoje ku ai punonte, u gjetën dhe u sekuestruan 19 doza kanabisi, të ndara dhe gati për shitje.

Gjatë operacionit u sekuestruan gjithashtu lënda narkotike dhe një telefon celular, të cilat do të përdoren si prova materiale në procesin hetimor.

Materialet procedurale i janë referuar Prokurorisë pranë Gjykatës së Juridiksionit të Përgjithshëm Dibër, për vijimin e veprimeve të mëtejshme ligjore.