Vlorë/Finalizohet operacioni policor “Reagimi”, arrestohet autori i vjedhjes së një automjeti

Policia e Vlorës ka finalizuar operacionin policor të koduar “Reagimi”, duke identifikuar dhe arrestuar autorin e vjedhjes së një automjeti të kryer gjatë natës.

Pas kallëzimit të bërë nga një shtetase, e cila denoncoi se automjeti i saj ishte vjedhur gjatë orëve të natës, shërbimet e Komisariatit të Policisë Vlorë reaguan menjëherë, duke organizuar veprime intensive për zbardhjen e ngjarjes dhe kapjen e autorit.

Pas reagimit të strukturave të Policisë, në kuadër të operacionit “Reagimi”, u bë i mundur identifikimi dhe arrestimi i shtetasit S. K., 45 vjeç, banues në Vlorë, i dyshuar si autor i vjedhjes.

Gjatë operacionit, Policia arriti gjithashtu të gjejë dhe sekuestruar automjetin e vjedhur, i cili do t’i kthehet pronarit të ligjshëm.

Materialet procedurale i janë referuar Prokurorisë pranë Gjykatës së Shkallës së Parë Vlorë, për veprime të mëtejshme ligjore, për veprën penale “Vjedhja”. /noa.al