Peqin, 23 janar 2026 Një operacion i sigurisë së lartë është zhvilluar mbrëmjen e sotme në sistemin penitenciar, ku 90 të dënuar me rrezikshmëri të lartë janë transferuar nga Institucioni i Ekzekutimit të Vendimeve Penale në Fushë-Krujë drejt atij të Peqinit.

Burime zyrtare bëjnë me dije se transferimi është kryer nën masa të rrepta sigurie, me përfshirjen e strukturave të specializuara të Policisë së Shtetit dhe shërbimeve penitenciare, duke garantuar rendin dhe mbarëvajtjen e plotë të operacionit. Ky veprim vjen në vazhdën e rishikimit të skemës së sigurisë në burgje, pas arratisjes së bujshme të të dënuarit Altin Ndoci nga spitali i Durrësit më 13 janar.

Sipas autoriteteve, transferimi është pjesë e një procesi rishpërndarjeje të të dënuarve me rrezikshmëri të lartë, me qëllim forcimin e masave të sigurisë dhe parandalimin e ngjarjeve të ngjashme në të ardhmen. Megjithatë, lëvizja e menjëhershme e një numri kaq të madh të dënuarish ka sjellë vështirësi në akomodim dhe në procesin e përshtatjes së tyre në institucionin pritës, duke krijuar një ngarkesë të shtuar për strukturat e IEDP Peqin.

Autoritetet konfirmojnë se operacioni është përmbyllur pa incidente dhe se situata në të dy institucionet paraqitet e qetë dhe nën kontroll. Më herët, pas arratisjes së Ndocit, ishte realizuar edhe transferimi i një grupi tjetër të dënuarish me rrezikshmëri të lartë nga burgu i Durrësit drejt Peqinit, në kuadër të të njëjtave masa sigurie të shtuara.