Itali

Pavarësisht se u përball me Arsenalin në Ligën e Kampionëve vetëm tre ditë më parë, Interi rikthehet sërish në fushë mbrëmjen e sotme për të sfiduar Pizën, në një ndeshje të rëndësishme kampionati përpara përballjeve të mëdha të fundjavës, Juventus–Napoli dhe Roma–Milan.

Ngjeshja e kalendarit për zikaltrit ka ngjallur debate, por arsyeja është e qartë: ndeshja ndaj Pizës do të jetë e fundit që luhet në “San Siro” përpara pushimit olimpik.

Duke nisur nga dita e nesërme, stadiumi “Giuseppe Meazza” do t’i nënshtrohet përgatitjeve për ceremoninë e hapjes së Lojërave Olimpike Dimërore “Milano–Cortina 2026”, e planifikuar për 6 shkurt. Për pasojë, Interi dhe Milani do të detyrohen të luajnë jashtë shtëpisë për rreth një muaj.

Kalendari i Interit gjatë mbylljes së San Siros

Inter – Pisa (Serie A, 23 janar)

Borussia Dortmund – Inter (Liga e Kampionëve, 28 janar)

Cremonese – Inter (Serie A, 1 shkurt)

Inter – Torino (Kupa e Italisë, 4 shkurt – ndeshja do të luhet në Monza)

Sassuolo – Inter (Serie A, 8 shkurt)

Kalendari i Milanit

Roma – Milan (Serie A, 25 janar)

Bologna – Milan (Serie A, 3 shkurt)

Milan – Como (Serie A, datë për t’u përcaktuar)

Pisa – Milan (Serie A, 15 shkurt)

Kuqezinjtë ende nuk e dinë datën zyrtare të ndeshjes së shtyrë ndaj Comos së drejtuar nga Fabregas, pasi gjithçka lidhet me ecurinë e Interit në fazën e Ligës së Kampionëve.

Nëse zikaltrit kualifikohen për play-off duke u renditur mes vendeve 9–16, ndeshja Milan–Como do të zhvillohet në mesjavë, mes 16 dhe 21 shkurtit. Në të kundërt, ajo do të shtyhet për periudhën 23–28 shkurt. Kujtohet se skuadrat e renditura më lart luajnë ndeshjen e dytë të play-off-eve në shtëpi.

Rikthimi në San Siro

Skuadra e parë milaneze që do të rikthehet në “San Siro” pas pushimit olimpik do të jetë Interi, i cili do të presë Juventusin në fundjavën e Shën Valentinit. Ndeshja e dytë në shtëpi për zikaltrit do të përcaktohet më vonë.

Ndërkohë, AC Milani do të rikthehet në “Meazza” në mënyrë të sigurt në fundjavën e 22 shkurtit, kur do të përballet me Parmën.