Prizren / Aksion policor për dyshime mbi manipulimin e votave në zgjedhjet e 28 dhjetorit

Autoritetet e Kosovës kanë ndërmarrë një operacion policor në rajonin e Prizrenit, në kuadër të hetimeve për dyshime mbi keqpërdorimin e votave në zgjedhjet e parakohshme parlamentare të mbajtura më 28 dhjetor.

Zëdhënësja e Policisë së Kosovës, Luljeta Mehmeti, konfirmoi se aksioni po zhvillohet në bashkëpunim me Prokurorinë Themelore në Prizren, duke theksuar se për momentin nuk mund të jepen detaje shtesë, pasi operacioni është ende në zhvillim. Informacione më të plota pritet të bëhen publike pas përfundimit të veprimeve hetimore.

Sipas burimeve paraprake, mbi 100 zyrtarë janë thirrur për t’u marrë në pyetje dhe nuk përjashtohet mundësia e arresteve. Aksioni lidhet me dyshime për manipulime të gjera të votave, çka ka shtyrë Komisionin Qendror të Zgjedhjeve (KQZ) të nisë një rinumërim të plotë të fletëvotimeve në këtë zonë.

Hetimet fillestare kanë evidentuar mospërputhje të konsiderueshme në votat e kandidatëve për deputetë, situatë që ka çuar edhe në shkarkimin e përfaqësuesve politikë të komisionit komunal zgjedhor në Prizren.

Në Kosovë, manipulimi i votave përbën vepër penale të dënueshme me burg. Megjithatë, sipas një raporti të organizatës joqeveritare ÇOHU, më shumë se 90% e rasteve të trajtuara nga drejtësia përfundojnë me dënime me kusht ose gjoba, dhe jo me burgim efektiv.

Zgjedhjet e 28 dhjetorit u fituan nga Lëvizja Vetëvendosje, e udhëhequr nga kryeministri në detyrë Albin Kurti, e cila siguroi mbi 51% të votave dhe 57 mandate në legjislaturën e dhjetë. Rinumërimi i votave nuk pritet të ndryshojë ndarjen e mandateve mes partive, por mund të vonesë procesin e formimit të qeverisë së re.