Moderatorja dhe modelja e njohur holandeze Sylvie Meis ishte viktimë e një vjedhjeje me thyerje gjatë verës së vitit 2023, teksa ndodhej me pushime në Ibiza. Sipas autoriteteve gjermane, nga banesa e saj u vodhën çanta luksoze dhe bizhuteri me vlerë mbi 800 mijë euro.

Më 22 janar, një nga dy të dyshuarit u paraqit para Gjykatës së Lartë Rajonale të Hamburgut, ku akuzohet për vjedhje me thyerje në bashkëpunim. Bëhet fjalë për një shtetas shqiptar, i identifikuar me inicialet M.U., i cili në ditën e parë të gjyqit bëri një rrëfim të plotë lidhur me ngjarjen.

Sylvie Meis nuk ishte e pranishme në seancën e parë, pasi nuk ishte thirrur si dëshmitare.

Sipas aktakuzës, vjedhja ka ndodhur në periudhën 6–14 korrik 2023, kohë gjatë së cilës prezantuesja ndodhej jashtë vendit, fakt që ajo e kishte dokumentuar edhe në rrjetet sociale. Hetimet tregojnë se autorët kanë hyrë në banesë përmes një ndërtese fqinje që ishte e rrethuar me skela dhe kanë depërtuar në apartament duke thyer një dritare tavani që nuk ishte e lidhur me sistem alarmi.

Nga garderoba e banesës janë marrë 22 çanta Hermès, katër çanta Chanel, si dhe çanta të markave Bulgari, Céline dhe Yves Saint Laurent, përveç bizhuterive të shtrenjta. Vlera totale e sendeve të vjedhura vlerësohet rreth 800 mijë euro, citon noa.al, portalin Ibiza live Report.

I pandehuri, baba i dy fëmijëve, ka deklaruar se ka përfituar 15 mijë euro për pjesëmarrjen në vjedhje. Ai ka theksuar se më parë ka punuar ligjërisht si shofer taksie dhe se vendimi i tij lidhej me vështirësi të rënda familjare dhe shëndetësore, përfshirë sëmundje kronike të prindërve.

Procesi gjyqësor vijon, ndërsa autoritetet po hetojnë edhe rolin e bashkëpunëtorit tjetër të dyshuar.