Të dhënat po ngarkohen...
Transmetuar më 22-01-2026, 20:53
Davos, Zvicër, 22 janar 2026
Elon Musk, drejtuesi i platformës X, ka kritikuar ashpër Bordin e Paqes të sapo shpallur nga presidenti i SHBA-së, Donald Trump, duke e shoqëruar reagimin e tij me ironi dhe batuta gjatë fjalimit në Forumin Ekonomik Botëror në Davos.
Musk e nisi ndërhyrjen e tij me një lojë fjalësh mes termave “pjesë” dhe “paqe”, duke ngritur dyshime mbi qëllimin real të nismës. “Dëgjova për formimin e samitit të paqes dhe mendova: a është për paqe apo për pushtim?”, tha ai, duke shkaktuar reagime në sallë. Më tej shtoi me ironi: “E dini, një copë e vogël e Groenlandës, një copë e vogël e Venezuelës”.
Deklaratat e Musk erdhën në të njëjtën ditë kur Donald Trump, po në Davos, nënshkroi zyrtarisht kartën e Bordit të Paqes, duke e formalizuar këtë strukturë si pjesë të fazës së dytë të planit të tij 20-pikësh, i prezantuar në shtator. Sipas Shtëpisë së Bardhë, nisma synon të kontribuojë në dhënien fund të luftës në Gaza.
Ndër vendet e para që iu bashkuan publikisht Bordit të Paqes ishin Emiratet e Bashkuara Arabe, Shqipëria, Armenia, Azerbajxhani, Bjellorusia, Hungaria, Kazakistani, Maroku dhe Vietnami.
Nga ana tjetër, Franca ishte ndër shtetet e fundit që e hodhën poshtë ofertën, duke deklaruar të enjten se statuti i bordit nuk përputhet me rezolutat e Kombeve të Bashkuara për zgjidhjen e konfliktit në Gaza.
Komentet e Musk kanë ndezur debate të reja rreth rolit dhe legjitimitetit të Bordit të Paqes, në një kohë kur tensionet gjeopolitike mbeten të larta dhe vëmendja ndërkombëtare është e përqendruar te zhvillimet në Lindjen e Mesme.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd