Uashington, 21 janar 2026 Ish-deputeti i Kuvendit të Kosovës dhe aktivist për të drejtat e shqiptarëve në Shtetet e Bashkuara, Faton Bislimi, ka deklaruar se miratimi i rezolutës amerikane për Luginën e Preshevës përbën një fitore të rëndësishme politike dhe morale për shqiptarët e kësaj zone.

Në një reagim nga Capitol Hill, Bislimi bëri të ditur se Komiteti për Punë të Jashtme i Kongresit të SHBA ka miratuar rezolutën H.R. 6411, të iniciuar nga kongresmeni Keith Self, kryetar i Nënkomitetit për Evropën, e cila adreson shkeljet e të drejtave etnike dhe kombëtare të shqiptarëve në Luginën e Preshevës.

Sipas tij, rezoluta ka marrë mbështetje dypartiake nga drejtuesit e Komitetit, Brian Mast dhe Gregory Meeks, duke i hapur rrugë miratimit të saj në seancë plenare të Kongresit amerikan në një fazë të afërt.

Bislimi e cilësoi këtë zhvillim si rezultat të një përpjekjeje të gjatë dhe të vazhdueshme që daton prej vitit 2001, nën angazhimin e Ligës Qytetare Shqiptaro-Amerikane të drejtuar nga Joe dhe Shirley DioGuardi, si dhe të organizatës “Albanians For America”, veçanërisht komunitetit shqiptar në Texas.

“Rezoluta i jep fund heshtjes institucionale ndaj diskriminimit sistematik të shqiptarëve në Luginën e Preshevës dhe vendos përgjegjësi politike e ligjore mbi autoritetet në Beograd”, u shpreh Bislimi, duke e cilësuar këtë moment si një sinjal të fortë nga Uashingtoni kundër padrejtësive etnike në rajon.

Ai theksoi se miratimi i rezolutës përkon simbolikisht me përvjetorin e ndarjes nga jeta të Presidentit historik të Kosovës, Ibrahim Rugova, duke nënvizuar se vizioni i tij për aleancën strategjike me Shtetet e Bashkuara po materializohet në veprime konkrete.

“Rugova nuk ishte retorikë, por orientim strategjik. Sot, kjo rezolutë dëshmon se besimi në Amerikë dhe në drejtësinë ndërkombëtare ishte rruga e duhur”, theksoi ai.

Rezoluta H.R. 6411 parashikon vlerësimin institucional të diskriminimit ndaj shqiptarëve në Luginën e Preshevës dhe kërkon nga autoritetet amerikane monitorim dhe presion diplomatik ndaj Serbisë për respektimin e të drejtave të njeriut.

Sipas Bislimit, ky zhvillim përbën një hap konkret drejt shtrirjes së lirisë dhe barazisë edhe për shqiptarët jashtë kufijve të Kosovës, duke e cilësuar momentin si “ditë të bardhë për mbarë kombin shqiptar”.