Tiranë, 20 janar 2026 – Kuvendi i Shqipërisë pritet të hapë një kanal të ri televiziv institucional, të quajtur “Media Hub”, projekt i cili sipas dokumentacionit zyrtar parashikon një kosto fillestare prej rreth 50.2 milionë lekësh (afërsisht 500 mijë euro), si dhe 0.8 milionë lekë për hartimin e projektit.

Propozimi për ngritjen e këtij kanali është paraqitur sot për shqyrtim në Byronë e Kuvendit. Sipas materialeve shoqëruese, synimi i nismës është që Kuvendi të prodhojë vetë përmbajtje mediatike mbi veprimtarinë parlamentare, përfshirë lajme, kronika dhe intervista me deputetë.

Projekti parashikon ngritjen e një Media Room-i – një qendër e integruar multimediale brenda Kuvendit, e konceptuar si një redaksi televizive profesionale që do të funksionojë në mënyrë të përhershme dhe do të bashkëpunojë ngushtë me RTSH-në, konkretisht për transmetimin në kanalin RTSH Kuvend.

Në kuadër të këtij projekti, parashikohet krijimi i një drejtorie të re (Media Room) pranë Shërbimit të Informacionit dhe Dokumentacionit të Kuvendit, e cila do të ketë tre funksione kryesore:

Informuese, për të përcjellë në mënyrë transparente veprimtarinë parlamentare;

Analitike, për të shpjeguar proceset ligjvënëse, reformat dhe ndikimin e tyre;

Edukative, për të ndihmuar qytetarët të kuptojnë rolin dhe funksionimin e Kuvendit.

Në fazën fillestare, projekti parashikon:

një strukturë të reduktuar redaksionale me staf minimal;

prodhim përmbajtjesh bazike si transmetime live, kronika dhe intervista;

ndërtimin e sistemit editorial dhe organizativ;

bashkëpunim të plotë me RTSH-në për transmetimin dhe arkivimin e materialeve.

Programacioni i kanalit parlamentar synon të ofrojë një pasqyrë të strukturuar dhe të kuptueshme të veprimtarisë së Kuvendit, duke balancuar informimin e menjëhershëm, analizën, edukimin qytetar dhe transparencën institucionale.

Projekti përbëhet nga dy komponentë kryesorë:

Studio televizive moderne, me kapacitete të plota prodhimi audio-video, arkivim dhe publikim online në kohë reale, si dhe integrim me RTSH Kuvend dhe platformat sociale të Kuvendit.

Platformë publike televizive e integruar me shërbime të Inteligjencës Artificiale, e cila parashikon transmetime live të seancave plenare dhe komisioneve, titrim, gjuhë shenjash, përmbledhje tematike, arkiv digjital të indeksuar, shërbime për media dhe deputetë, debate interaktive, si dhe krijimin e një databaze historike të kulturës parlamentare.

Projekt-propozimi pritet të shqyrtohet nga strukturat drejtuese të Kuvendit për miratim ose ndryshime të mëtejshme.

Argumentimi i plotë:

Media Hub i Kuvendit me shërbime të Integruara të Inteligjencës Artificiale, 50.2 milion lekë investimi dhe 0.8 milion lekë projekti.

Media Room-i është menduar të jetë një qendër e integruar multimediale brenda Kuvendit të Shqipërisë, e konceptuar si një “redaksi televizive” profesionale, që funksionon në mënyrë të përhershme dhe bashkëpunon ngushtë me RTSH-në për transmetimin në kanalin RTSH Kuvend.

Për këtë synohet të ngrihet një drejtori e re (Media-Room) pranë Shërbimit të Informacionit dhe Dokumentacionit, e cila të ketë rol të trefishtë:

• Informues: të përcjellë në mënyrë transparente punën parlamentare për qytetarët.

• Analitik: të shpjegojë proceset legjislative, reformat dhe ndikimet e tyre.

• Edukues: të ndihmojë qytetarët të kuptojnë funksionet dhe rolin e Kuvendit.

Fillimisht parashikohet të nisë puna me:

• Strukturë të reduktuar redaksie me staf minimal.

• Prodhim të përmbajtjeve bazike: transmetime live, kronika, intervista.

• Ngritjen e sistemit editorial, organizativ dhe rrjedhës së punës.

• Bashkëpunim i plotë me RTSH-në, për transmetim dhe arkivim të materialeve.

Qëllimi i programacionit televiziv të kanalit parlamentar është të ofrojë një pasqyrë të plotë, të strukturuar dhe të kuptueshme të veprimtarisë së Kuvendit për publikun e gjerë.

Programet duhet të jenë të balancuara ndërmjet informimit të menjëhershëm, analizës së thelluar, edukimit qytetar dhe transparencës institucionale.

Ka dy komponentë kryesorë (1 dhe 2):

Studio televizive moderne

• Prodhim i plotë video/audio për TV Parlamentar.

• Arkivim dhe publikim online në kohë reale.

• Integrim i menjëhershëm me RTSH Kuvend dhe platformat sociale të Kuvendit.

Platformë publike televizive e Kuvendit, e integruar me shërbimet AI

• Transmetime Live dhe Multiplatformë: seanca plenare dhe mbledhje komisionesh, me komentim opsional, titrim dhe gjuhë të shenjave.

• Përmbledhje dhe analiza: kronika ditore dhe javore, përmbledhje tematike mbi çështje ligjvënëse dhe debate, të transmetuara në RTSH Kuvend, online dhe në rrjete sociale.

• Arkiv Digjital i Indeksuar.

• Shërbime për Media dhe Deputetë.

• Debate dhe Interaktivitet.

• Databazë Historike dhe Kulturë Parlamentare.

• Multimedia dhe Platforma Online.