Greqi, 19 janar 2026 – Policia greke ka identifikuar autorin e vrasjes së shtetasit shqiptar Jani Aliaj, i ekzekutuar në burgun e Koridhalosit. Sipas autoriteteve, autori është një 28-vjeçar grek, i njohur nga policia si vrasës me pagesë.

Burime zyrtare bëjnë me dije se i dyshuari është i njëjti person që më 18 gusht 2025 ekzekutoi Artur Bashimin, 47 vjeç, me origjinë nga Gjirokastra, ngjarje e ndodhur jashtë ambienteve të burgut.

Policia greke dyshon se edhe vrasja e Jani Aliajt është e porositur nga jashtë burgut dhe e kryer kundrejt pagesës, duke forcuar pistën e një ekzekutimi të mirëorganizuar dhe jo të një konflikti spontan mes të dënuarve.

Sipas hetimeve, Artur Bashimi u vra me armë zjarri nga i njëjti autor. Viktima ishte një ish i dënuar për vjedhje dhe dyshohet se u ekzekutua për motive hakmarrjeje, në lidhje me aktivitetet kriminale të vëllait të tij, Marsel Bashimi, i përfshirë në ngjarje të rënda kriminale në Greqi.

Autoritetet greke po vijojnë hetimet për të zbardhur rrjetin e porositësve dhe lidhjet kriminale që çuan në vrasjen e dyfishtë, ndërsa i dyshuari mbetet nën masa të rrepta sigurie.