Durrës, 19 janar 2026 – ora 10:00

Gjykata e Durrësit ka konfirmuar masën e sigurisë “arrest me burg” për ish-drejtorin e Institucionit të Ekzekutimit të Vendimeve Penale (IEVP) Durrës, Indrit Cërloj, i arrestuar tre ditë më parë në lidhje me arratisjen e të paraburgosurit Altin Ndoci.

Cërloj akuzohet për shpërdorim detyre, ndërsa masa e sigurisë ishte vendosur fillimisht më 16 janar dhe u la sërish në fuqi nga gjykata. Po ashtu, gjykata konfirmoi masën “arrest shtëpie” për mjeken Ylvete Sema, 65 vjeçe, e përfshirë në të njëjtën çështje.

Ngjarja ndodhi gjatë shoqërimit të Altin Ndocit për një kontroll mjekësor në spitalin e qytetit të Durrësit, nga ku ai arriti të arratisej. Një ditë pas ngjarjes, Ministri i Drejtësisë Besfort Lamallari firmosi shkarkimin e Indrit Cërloj nga detyra si drejtor i IEVP Durrës, si dhe pezullimin e të gjithë zinxhirit komandues të institucionit.

Nga verifikimet paraprake rezulton se IEVP Durrës nuk ka raportuar në Drejtorinë e Përgjithshme të Burgjeve as planifikimin dhe as realizimin e vizitës mjekësore, në kundërshtim me aktet nënligjore në fuqi. Gjithashtu, nuk janë respektuar procedurat standarde për shoqërimin e të paraburgosurve dhe të dënuarve.

Në kuadër të hetimeve, janë arrestuar gjithsej 8 punonjës, mes tyre efektivë të Policisë së Burgjeve dhe staf mjekësor:

Komisar Dezdemon Pazaj

Komisar Violeta Uka

Kryeinspektor Dorjan Saraçi

Inspektor Sali Ferrollari

Inspektor Fatjon Braçi

Inspektor Preng Marvataj

Kryeinspektor Aranit Çela

Kryeinfermier Aulon Quku

Hetimet për zbardhjen e plotë të rrethanave të arratisjes vijojnë.