Austri, 17 janar 2026

Pesë skiatorë kanë humbur jetën në Austri pas dy ortekëve të ndodhur brenda pak orësh në Alpet austriake, ndërsa moti i keq dhe reshjet e dendura të dëborës vijojnë të rrisin rrezikun në zonat malore të Europës.

Ngjarja më e rëndë u regjistrua të shtunën në rajonin Pongau të Salzburgut, ku një ortek i fuqishëm goditi një grup prej shtatë skiatorësh. Si pasojë, katër persona humbën jetën, ndërsa një tjetër mbeti i plagosur rëndë dhe u transportua me urgjencë në spital.

Rreth një orë e gjysmë më vonë, një tjetër ortek përfshiu një skiator tjetër në të njëjtën zonë, i cili u plagos për vdekje, duke e çuar në pesë numrin e viktimave vetëm në Austri.

Autoritetet raportojnë se moti ekstrem ka shkaktuar të paktën nëntë viktima në Alpe gjatë javës së fundit. Të martën, një djalë 13-vjeçar nga Çekia humbi jetën pasi u përfshi nga një ortek në vendpushimin e skive Bad Gastein. Ndërkohë, të dielën e kaluar, një skiator 58-vjeçar u vra nga një ortek në rajonin e Tirolit.

Situata mbetet shqetësuese edhe në vendet fqinje. Në Zvicër, një shtetas gjerman humbi jetën dhe katër të tjerë u plagosën gjatë skijimit në zona jashtë pistave të kontrolluara. Ndërsa në Francë, fundjavën e kaluar, gjashtë skiatorë humbën jetën në ortekë të ndodhur në disa zona të Alpeve franceze.

Autoritetet alpine u kanë bërë thirrje skiatorëve dhe alpinistëve të shmangin zonat e rrezikshme dhe të respektojnë paralajmërimet për rrezik të lartë nga ortekët, ndërsa kushtet e motit pritet të mbeten të paqëndrueshme edhe në ditët në vijim.