Ngricat e ditëve të para të vitit 2026 kanë shkaktuar dëme të rënda në bujqësi. Në zonën e Zharrëzës, në Patos, fermeri Fatjon Asllani është detyruar të flakë rreth 30 tonë domate, pasi prodhimi i tij u shkatërrua plotësisht nga temperaturat nën zero.

Asllani bën me dije se ngricat kanë goditur rëndë serat, duke mos lënë asnjë mundësi shpëtimi për prodhimin. Ai shprehet se një dëm i tillë nuk është përjetuar asnjëherë më parë, pavarësisht se ka pasur humbje edhe nga përmbytjet në vite të mëparshme.

Sipas tij, dëmi financiar kap vlerën mbi 2 milionë lekë të reja, një goditje e rëndë për ekonominë familjare. Fermeri thekson se nuk ka më mundësi financiare për të vijuar aktivitetin dhe se, pa ndërhyrjen e shtetit, rrezikon falimentimin.

“Kur erdha në sera më 1 janar, pashë gjithë prodhimin të shkatërruar. Gjithçka ishte ngrirë, nuk kishte më asgjë për të shpëtuar. Kam pësuar dëme edhe nga përmbytjet, por kjo është goditja më e rëndë. Shpresa ime e vetme është dëmshpërblimi. Nëse nuk do të kem ndihmën e shtetit, jam i falimentuar. Nuk kam asnjë mundësi tjetër,” deklaroi Asllani.