Dibër/Mat – Polumbarët e RENEA-s, në bashkëpunim me strukturat e Policisë së Shtetit dhe institucione të tjera, vijojnë prej datës 10 janar 2026 kërkimet intensive në lumin Mat për gjetjen e shtetasit Jurgen Karaj, 30 vjeç, i cili dyshohet se është marrë nga rrjedha e përroit të fshatit Dars dhe më pas është transportuar nga uji drejt lumit Mat.

Në operacionin e kërkimit janë angazhuar polumbarët e RENEA-s, Forca Kombëtare e Sigurisë, Forca e Posaçme “Shqiponja”, shërbimet e Drejtorisë Vendore të Policisë Dibër, Komisariati i Policisë Mat, Shërbimi i Mbrojtjes nga Zjarri dhe Shpëtimi, përfaqësues të Forcave të Armatosura, si dhe forca vullnetare dhe familjarë të 30-vjeçarit.

Kërkimet po zhvillohen përgjatë shtratit të lumit nga të dyja anët, me qëllim krehjen e zonës dhe verifikimin e çdo piste të mundshme.

Deri në këto momente, nuk është bërë e mundur gjetja e trupit të 30-vjeçarit.

Policia e Dibrës, së bashku me polumbarët e RENEA-s, Forcat Kombëtare të Sigurisë dhe strukturat e tjera të përfshira, vijojnë operacionin me intensitet të lartë dhe pa ndërprerje, me qëllim lokalizimin dhe gjetjen e shtetasit Jurgen Karaj.