Durrës, 16 janar 2026 – Vetëm një ditë pas shkarkimit nga detyra, ish-drejtori i Burgut të Durrësit, Indrit Cërloj, është arrestuar nga autoritetet, në lidhje me arratisjen e të paraburgosurit me rrezikshmëri të lartë shoqërore, Altin Ndoci.

Lajmi është konfirmuar nga burime të Policisë së Shtetit për noa.al.

Sipas informacioneve zyrtare, arrestimi i Cërloj lidhet drejtpërdrejt me ngjarjen e arratisjes nga ambientet e sigurisë së lartë të burgut. Me vendim të Gjykatës së Durrësit, është vendosur gjithashtu masa e arrestit në shtëpi për shefen e Shërbimit Shëndetësor në Burgun e Durrësit, Ylfete Sema.

Të dy zyrtarët akuzohen për veprën penale të shpërdorimit të detyrës.

PËRDITËSIM: Durrës – Lokalizohet, kapet dhe vihet në pranga ish-drejtori i IEVP Durrës.

Ekzekutohet masa e sigurisë edhe për doktoreshën e IEVP Durrës.

Specialistët e Seksionit për Hetimin e Krimeve Ekonomike dhe Financiare, në bashkëpunim me Seksionin për Mbështetjen Operacionale në Drejtorinë Vendore të Policisë Durrës, bënë të mundur lokalizimin dhe kapjen e shtetasit I. C., 48 vjeç, banues në Durrës, ish-drejtor i IEVP Durrës.

Për këtë shtetas, Gjykata e Shkallës së Parë e Juridiksionit të Përgjithshëm Durrës, me vendimin nr. 19/1, datë 15.01.2026, ka caktuar masën e sigurisë “Arrest në burg”, për veprën penale “Shpërdorimi i detyrës”.

Gjithashtu, me të njëjtin vendim, kjo gjykatë ka caktuar masën e sigurisë “Arrest në shtëpi” për shtetasen Y. S., 66 vjeçe, banuese në Durrës, doktoreshë në IEVP Durrës, për veprën penale “Shpërdorimi i detyrës”.

Materialet do t’i kalojnë Prokurorisë së Juridiksionit të Përgjithshëm Durrës, për veprime të mëtejshme.