Goditet një tjetër rast i rëndë në zonën e Krujës, policia sekuestron sasi të konsiderueshme dhe arreston 52-vjeçarin

Operacioni policor i koduar “Cargo”, i finalizuar nga Seksioni për Hetimin e Narkotikëve në bashkëpunim me Forcën e Posaçme Operacionale, ka çuar në arrestimin në flagrancë të një 52-vjeçari dhe në sekuestrimin e 60 kilogramëve lëndë të dyshuar narkotike kanabis.

Shtetasi Afrim Meça, 52 vjeç, banues në Krujë, u ndalua nga shërbimet e Policisë në fshatin Luz, Fushë-Krujë, teksa po transportonte me automjet 6 thasë me lëndë të dyshuar cannabis sativa. Sasia e sekuestruar kap një vlerë të përafërt prej 60 mijë eurosh.

Nga hetimet paraprake dyshohet se lënda do të shpërndahej në doza të vogla në qytetin e Krujës dhe në Tiranë. Gjatë operacionit u sekuestruan gjithashtu automjeti dhe një telefon celular, në cilësinë e provave materiale.

Policia bën me dije se hetimet vijojnë për dokumentimin e plotë të kësaj veprimtarie dhe për identifikimin e personave të tjerë të përfshirë. Materialet procedurale i janë referuar Prokurorisë për veprime të mëtejshme ligjore. /noa.al