Një incident i pazakontë ka ndërprerë për 24 orë gjyqin ndaj Franc Çopjas, i njohur edhe si Franc Gergely, i cili po zhvillohej në ndërtesën gjyqësore Justitia në Evere, Belgjikë.

Sipas mediave belge, një nga anëtarët e jurisë vuri re praninë e një pleshti mbi krahun e të pandehurit, çka çoi fillimisht në një pushim të seancës. Pas rikthimit nga pauza e drekës, kryetarja e trupit gjykues vendosi shtyrjen e procesit për një ditë, me qëllim marrjen e masave të nevojshme higjieno-sanitare.

“Nuk dua të vë askënd në rrezik, as anëtarët e jurisë, as avokatët, as të pandehurit,” deklaroi kryetarja e trupit gjykues, Isabelle de Saedeleer, duke theksuar se situata ishte e papranueshme. Ajo u rekomandoi të gjithë të përfshirëve që të lajnë rrobat në 60 gradë Celsius ose, alternativisht, t’i vendosin në frigorifer për dezinfektim.

Mediat lokale e lidhin këtë incident me vështirësitë më të gjera me të cilat po përballet sistemi i drejtësisë në Belgjikë, i karakterizuar nga mbingarkesa e gjykatave dhe mbipopullimi i burgjeve, në një kohë kur vendi po përballet me sfida të shtuara në luftën kundër trafikut të drogës.

Gjyqi ndaj Franc Gergely (Çopja) dhe tetë të pandehurve të tjerë nisi më 5 janar. Ata akuzohen për përfshirje në vrasjen e Ardit Spahiut, të ndodhur më 27 nëntor 2020 në Molenbeek. Hetimet lidhen gjithashtu me dy klane kriminale të dyshuara për trafikim të gjerë të kokainës, të cilat u identifikuan pas depërtimit të autoriteteve në shërbimin e mesazheve të koduara Sky ECC.