Tetë persona janë arrestuar pas arratisjes së Altin Ndocit, e ndodhur një ditë më parë nga Spitali Rajonal i Durrësit, gjatë një vizite mjekësore.

Mes të arrestuarve ndodhen kryeinfermieri i spitalit dhe zëvendësshefi i komanduar i Policisë, si dhe pesë efektivë të policisë së burgjeve që ishin përgjegjës për shoqërimin e të dënuarit. Në pranga ka rënë gjithashtu edhe një shtetase tjetër, e përfshirë në hetim.

Personat e arrestuar janë:

Aulon Çuko, kryeinfermieri

Desdemon Pazaj, zëvendësshef i policisë

Efektivët e shoqërimit: Dorjan Saraçi, Sal Ferollari, Preng Marvataj, Fatjon Baçi, Aranit Çela

Violeta Uka

Sipas të dhënave paraprake, rreth orës 13:00 të së martës, Altin Ndoci është shoqëruar nga dy efektivë policie në pavijonin e infektivit, së bashku me një të dënuar tjetër. Gjatë pritjes për vizitën mjekësore, ai ka kërkuar të shkojë në tualet, moment në të cilin ka goditur në befasi efektivin që e ruante dhe është larguar me vrap.

Ndoci është larguar me një automjet tip “Audi”, i cili dyshohet se e priste jashtë ambienteve të spitalit. Një nga efektivët që tentoi ta ndalonte ka qëlluar me armën e shërbimit në tokë, ku si pasojë e rikoshetës, predha ka përfunduar në shkallët e pavijonit të infektivit. Gëzhoja ende nuk është gjetur.

Nga hetimet e deritanishme rezulton se nuk janë respektuar protokollet standarde të shoqërimit të personave të paraburgosur apo të dënuar gjatë vizitave mjekësore, veçanërisht sa i përket numrit të efektivëve të policisë së burgjeve dhe masave të sigurisë.

Autoritetet vijojnë hetimet për zbardhjen e plotë të ngjarjes dhe për identifikimin e personave të tjerë që mund të kenë ndihmuar në arratisje.