Durrës, 12 janar 2026

Pas përfundimit të mbledhjes së Grupit Teknik Ndërsektorial (GTN), është vendosur që nëna dhe tre fëmijët e saj, Blerina Basha, të asistohen menjëherë me ndihmë mjekësore dhe sociale.

Sipas vendimit, ndërhyrja nis me sigurimin e të gjitha medikamenteve të nevojshme për trajtimin e sëmundjes infektive të zgjebes. Familja do të vijojë të qëndrojë në spital deri në shërimin e plotë nga sëmundja ngjitëse, ndërsa më pas do të zbatohet një proces i vazhdueshëm mbikëqyrjeje sociale në banesë. Paralelisht, do të kryhet pastrimi dhe dezinfektimi i apartamentit ku ata jetojnë.

Drejtoresha e Shërbimit Social pranë Bashkisë së Durrësit, Diola Xhango, bëri të ditur se në mbledhjen e GTN-së morën pjesë përfaqësues të Shërbimit Social, Policisë, Shëndetësisë dhe organizatave jofitimprurëse, duke u dakordësuar një plan i koordinuar ndërhyrjeje në funksion të forcimit dhe riintegrimit të familjes.

Sipas planit të miratuar, tre fëmijëve u janë dërguar veshmbathje në spital, ndërsa pritet të sigurohen edhe medikamentet e nevojshme për trajtimin, pasi ato nuk gjenden aktualisht në shërbimin e pediatrisë. Trajtimi mjekësor do të përfshijë si fëmijët, ashtu edhe nënën e tyre. Financimi i këtyre ndërhyrjeve është marrë përsipër nga organizatat Nisma ARSIS dhe World Vision.

Ndërkohë, do të nisë procesi i pasaportizimit dhe zhvendosjes së regjistrimit të familjes, e cila aktualisht figuron e regjistruar në Vau i Dejës. Regjistrimi si banorë të Bashkisë Durrës do t’i hapë rrugë përfshirjes së familjes në skemat e strehimit social.

Për nënën e fëmijëve, në bashkëpunim me Zyrën e Punës, do të shqyrtohet mundësia e punësimit në një vend pune të rregullt dhe dinjitoz, me orar 8-orësh, në mënyrë që ajo të ketë mundësi të kujdeset për rritjen dhe mirëqenien e fëmijëve. Aktualisht, ajo punon deri në 16 orë në ditë. Gjithashtu, do t’i ofrohet mbështetje psiko-sociale.

Shërbimi Social do të kryejë kontrolle dhe mbikëqyrje të përditshme të befasishme për të vlerësuar mbarëvajtjen e situatës familjare. Nëna do të jetë në një periudhë prove, gjatë së cilës do të vlerësohet aftësia e saj për të ushtruar kujdestarinë ndaj fëmijëve, me synimin përfundimtar mbajtjen e familjes së bashku dhe garantimin e interesit më të lartë të fëmijëve.