Prishtinë – Një konflikt familjar ka dalë në dritë mes këngëtares së njohur kosovare dhe kandidates për deputete nga Lëvizja Vetëvendosje, Edona Llalloshi, dhe ish-bashkëshortit të saj, Gazmond Haxhifejzullahut.

Haxhifejzullahu ka bërë deklarata të forta, duke pretenduar se Llalloshi po shkel vendimet e gjykatës dhe po përdor fëmijët si mjet presioni dhe hakmarrjeje, pas kërkesës së tij për ndarjen e pasurisë së përbashkët. Ai thotë se prej më shumë se tetë muajsh nuk ka pasur kontakt me fëmijët, një situatë që e përshkruan si dramatike dhe jashtëzakonisht të dhimbshme. “Jam i përjashtuar plotësisht nga jeta e fëmijëve të mi. Nuk më lejohet as t’i shoh, pavarësisht vendimeve të gjykatës”, thekson ai.

Sipas Haxhifejzullahut, konflikti familjar u thellua edhe nga ndikimet jashtëzakonisht personale, përfshirë, sipas tij, këshillat e një fallxhoreje, që sipas tij kanë ndikuar në vendimet e ish-bashkëshortes. “Këtu nisi shkatërrimi i familjes. Vendimet nuk merren më në bazë të arsyes, por të parashikimeve”, deklaron ai.

Ai shton se kërkesa e tij për ndarjen e pasurisë së përbashkët ka qenë një tjetër shkak që ka thelluar konfliktin dhe ka çuar në përjashtimin nga jeta e fëmijëve.