Tiranë, 11 janar 2026

Kryeministri Edi Rama deklaroi se qeveria ka përgatitur tashmë planin për dëmshpërblimin e dëmeve të shkaktuara nga përmbytjet që prekën vendin ditët e fundit, duke theksuar se niveli i dëmeve është shumëfish më i ulët krahasuar me përmbytjet e një dekade më parë.

Duke folur në podcastin e tij “Flasim”, Rama u shpreh se kjo situatë është rezultat i investimeve të konsiderueshme të realizuara ndër vite në infrastrukturë dhe në masat parandaluese kundër fatkeqësive natyrore.

“‘Ti nuk do të jesh kurrë vetëm’ është motoja ime dhe e jona sa herë që përballemi me fatkeqësi. Të goditurit e kësaj fatkeqësie dua t’u them se qëndrojmë krah tyre për banesat dhe gjënë e gjallë, për rregullimin e çdo dëmi me të cilin përballemi,” deklaroi kryeministri.

Sipas tij, plani i dëmshpërblimeve është i gatshëm dhe përfshin skenarë të ndryshëm, ndërsa shpërndarja e ndihmave financiare pritet të nisë menjëherë pas përfundimit të verifikimeve në terren nga strukturat përkatëse.

Rama theksoi se qeveria do të garantojë mbështetje për familjet e prekura, me synimin për të rikthyer normalitetin sa më shpejt të jetë e mundur në zonat e dëmtuara.