Shkodër, 10 janar 2026 Pas përmbytjeve të ditëve të fundit, vendi po përballet edhe me bllokime të akseve rrugore si pasojë e reshjeve intensive të borës dhe përkeqësimit të kushteve atmosferike. Autoritetet kanë njoftuar se është ndaluar qarkullimi i automjeteve në segmentin rrugor Bogë–Qafë Thore–Theth, për shkak të rrezikut të lartë nga ortekët e dëborës.

Sipas strukturave përgjegjëse, rrezikshmëria në këtë aks është shtuar ndjeshëm jo vetëm për shkak të akumulimit të borës, por edhe të kufizimit të fushëpamjes, çka e bën qarkullimin veçanërisht të rrezikshëm gjatë orëve të natës. Për këtë arsye, segmenti do të qëndrojë i bllokuar deri në orët e mëngjesit.

Kalimi i automjeteve do të lejohet vetëm në raste emergjence dhe vetëm në shoqërim nga mjetet borëpastruese dhe shërbimet e Policisë, me qëllim garantimin e sigurisë së udhëtarëve.

Autoritetet u bëjnë thirrje qytetarëve të shmangin lëvizjet e panevojshme në zonat malore dhe të ndjekin njoftimet zyrtare për situatën e akseve rrugore, deri në përmirësimin e kushteve të motit.