10 Janar 2026

Elbasan – Rruga Elbasan–Gjinar u bllokua paraditen e sotme për rreth një orë, si pasojë e rrëshqitjeve të dheut dhe shkëmbinjve, të shkaktuara nga reshjet e shumta të shiut gjatë kësaj jave.

Incidenti u regjistrua rreth orës 10:00, në afërsi të fshatit Lleshan, duke ndërprerë përkohësisht qarkullimin e automjeteve dhe duke krijuar vështirësi për banorët dhe mjetet që lëviznin në këtë aks kryesor. Rruga lidh disa fshatra të zonës së Shpatit me qytetin e Elbasanit dhe regjistron fluks të shtuar gjatë fundjavave, për shkak të vizitorëve që frekuentojnë zonat e turizmit dimëror malor.

Aktualisht, është hapur një korsi për të rikthyer qarkullimin, ndërsa në terren po punojnë ekipet e ASHP-së së Bashkisë Elbasan dhe Autoriteti Rrugor Shqiptar (ARRSH) për pastrimin e inerteve dhe normalizimin e trafikut.

Autoritetet apelojnë tek drejtuesit e mjeteve që të tregojnë kujdes të shtuar, të respektojnë sinjalistikën dhe të informohen për gjendjen e rrugës, pasi reshjet e vazhdueshme rrisin rrezikun e rrëshqitjeve të tjera në zonë.